12.10.10

இடுக்கண் வருங்கால் நகுவது எப்படி???


இடுக்கண் வருங்கால் நகுக, இதை வள்ளுவர் எந்த நிலையிலிருந்து சொன்னாரோ தெரியாது. வாழ்வு சீராய் செல்லும் வரை, அவர் சொன்ன இந்த குறட்பா ஏட்டுச் சுரைக்காயாகவே இருந்தது.

முதன்முதலில் என் வாழ்கை எதிர்பாரா திருப்பத்தை எதிர்நோக்கிய சந்தர்ப்பத்தில், நிலைகுலைந்து போனேன்.மேற்சொன்ன குறட்பா பொய்யெனப் பட்டது.

இதென்ன! துன்பம் வரும் போது கூட சிரிக்க முடியுமோ? இந்த ஆளுக்கென்ன ஜாலியா தாடியை நீவிக் கொண்டே எழுதிட்டு போயிட்டார். இது போன்ற நிலமை அவருக்கு வந்திருந்தால் தெரியும். இப்படி தான் எண்ணினேன்.

உலகில் எனக்கு மட்டுமே ஒரு அநியாயம் நடந்ததாய் தோன்றியது. என்னைத் தவிர எல்லோரும் சந்தோஷமாய் சிரித்துக் கொண்டிருப்பதாய் பட்டது.

அந்த திருப்பம் கடந்து போனது. கொஞ்சம் நாட்கள் கழித்து மற்றொரு பிரச்சனை. ஆண்டவன் ஏன் என்னை மட்டும் சோதிக்கிறான் என்ற கேள்வி எழுந்தது. ‘தனக்கு பிடித்தவர்களை ஆண்டவன் அதிகமாய் சோதிப்பான்’ என்ற ஏட்டுச் சுரைக்காய் பதிலாய் கிடைத்தது. அதுவும் சில நாட்களில் கடக்க, மற்றொரு பிரச்சனை பின்தொடர்ந்தது.

ஏதோவொன்று புரிவது போல் இருந்தது. ஒவ்வொரு பிரச்சனையின் பின்னும் வாழ்கைப் பாதை மாறினாலும், ஏதோ ஒரு விதத்தில் அது நன்மை பயப்பதாகவே இருந்திருந்தது. சாதாரணமாய் மாற்றத்தை ஏற்றுக்கொள்ளும் பக்குவம் எனக்கு இருந்ததில்லை.
ஆனால் இந்த சிக்கல்களின் மூலம் மாறவேண்டிய கட்டாயம் ஏற்பட்டது.
என்னைச் சுற்றி காய்கள் என் அனுமதியில்லாமலேயே அதிவேகமாய் நகர்த்தப்பட்டிருந்தன.

ஆனால் அந்த மாற்றத்திற்கு பின் வாழ்கை ஒரு படி மேலே போயிருந்தது. இப்போது இடுக்கண் வரும்போது வள்ளுவர் சிரித்ததன் மர்மம் புரிந்தது. ஆண்டவன் பிடித்தவர்களை அதிகமாய் சோதித்ததன் காரணமும் கூட.

இப்போதெல்லாம் பிரச்சனை வரும் போது சோர்ந்து போவதில்லை. மாறாக என் கொள்கைகள் சிலதை விட்டுக் கொடுக்கிறேன். என் வாழ்க்கையின் வேல்யூ சிஸ்டத்தை கொஞ்சமாய் மாற்றிக் கொள்வதன் மூலம் எந்த சிக்கலையும் எளிதாய் தீர்க்க முடிகிறது.

இந்த சின்ன சின்ன சமரசங்களினால்,என்னால் செய்ய முடியாது என்று நம்பிக் கொண்டிருக்கும் சில விஷயங்களை, சுலபமாய் சாதிக்க முடிகிறது. வரும் சிக்கலுள் ஒளிந்திருக்கும் நன்மையை தேடிப்பிடிக்கும் அளவுக்கு பக்குவப் பட்டு விட்டேன். ஒருவழியாய் ஏட்டுச் சுரைக்காயில் கறி சமைக்க கற்றுக் கொண்டுவிட்டேன்.

4 comments:

Balu said...

Good one. I think one should have mentality to accept what ever he face. Then what ever the problem you face may not hurt us. This may need some practice.

HVL said...

நன்றி Balu !

simariba said...

உண்மை!!!

HVL said...

நன்றி simariba.